Pan fo’r ddaear wedi gwylltio
Wedi’r esgeulustod mawr,
Nid oes driniaeth all ei hadfer
I’w gogoniant hyfryd nawr.
Rhaid cael fflam o dân i redeg
Ysa’r rhedyn coch a’r brwyn,
Felly, Gymru, bydd yn barod
Trefnwyd coelcerth er dy fwyn.
Cyn i’r cnwd aeddfedu’n iraidd,
Cyn cael gwared ar y graith
Awel iach o’r mynydd uchel –
Rhaid i hwnnw wneud ei waith.
Chwythu’r llwch oddi ar y gwreiddyn,
Ennill eto ffrwythlon dir,
Dim ond anadl dyner nefol
Wna i’r hadau wisgo fflur.
Disgwyl gweld y tir yn glasu,
Disgwyl gweld y lliw ar ffridd,
Ble mae’r gawod sydd yn golchi
Maeth y lludw mewn i’r pridd?
Arglwydd, rhaid i Ti ei danfon,
Rhaid wrth ffynnon newydd lân
Sydd yn tarddu yn dragwyddol
I ddwyn ffrwyth yr Ysbryd Glân.
Anne M. Davies