Gwybodaeth I ddod yn fuan am gynhadledd 2010.
Y mae’n bleser gennym dynnu eich sylw at Gynhadledd 2009!
Caiff ei chynnal rhwng 17-21 Awst yn Aberystwyth, a bydd yn cynnig pregethu Beiblaidd, cymdeithas Gristnogol gynnes a chyfle i gyd-addoli ein Duw rhyfeddol.
Prif siaradwr y Gynhadledd eleni yw Martin Williams, a bydd yn pregethu o lythyr Jwdas.
Yn ogystal â bod yn was ffyddlon i Dduw ers blynyddoedd ym Mhontarddulais, mae Martin yn siaradwr cyson yng nghynadleddau a gwersylloedd y Mudiad. Edrychwn ymlaen yn fawr at wrando arno’n esbonio Gair Duw.
Bydd nifer o siaradwyr eraill yn cymryd rhan yn y Gynhadledd gan gynnwys ymweliad arbennig gan Kevin Adams o America, Ben Thomas – gweinidog newydd yng Nghricieth ac Ifan Mason Davies.
Y Cadeirydd eleni fydd Derrick Adams.
Ynghyd â’r cyfarfodydd pregethu, trefnir nifer o weithgareddau eraill yn ystod yr wythnos. Bydd cyfarfodydd gweddi boreol yng ngofal Edmund Owen, cyfarfodydd ar gyfer y plant, seminarau, nifer o gyfarfodydd ar gyfer ieuenctid a myfyrwyr a lansiad arbennig y cwrs efengylu – Darganfod Cristnogaeth.
Hyderaf y byddwch yn gallu ymuno â ni eleni yn Aberystwyth a gofynnwn i chi gofio’r Gynhadledd yn eich gweddïau. Mae’n gyfrwng bendith fawr i nifer bob blwyddyn, ond rydym yn ymwybodol iawn mai methiant fydd y cwbl heb i Dduw fod yn bresennol a rhoi Ei fendith.
Clwb yr Hapus Awr:
Trefnir cyfarfodydd ar gyfer y plant yng Nghanolfan Sant Paul o dan arweiniad Phil Ellis, yn ystod anerchiadau’r Gynhadledd.
Caiff y plant gyfle i ddysgu storiau’r Beibl, canu caneuon, gwneud crefft a chael llond trol o hwyl!
Llety’r Ifanc:
Llety’r ifanc yw’r ‘trac’ arbennig ar gyfer ieuenctid. Yn ogystal â llety arbennig i’r ifanc a’r prif gyfarfodydd, bydd gweithgareddau a chyfarfodydd arbennig wedi eu trefnu drwy gydol yr wythnos. Yn dilyn newidiadau yn y rheolau iechyd a diogelwch, bydd yn rhaid i bob person o dan 18 oed a fydd yn mynychu’r Gynhadledd fod â pherson dros 25 oed yn gyfrifol amdanynt yn ystod yr wythnos. Er bod darpariaeth ar ffurf seminarau, cyfarfodydd i bobl ifanc, ynghyd â wardeiniaid i lety’r ifanc, ni all MEC gymryd cyfrifoldeb dros blant a phobl ifanc yn ystod yr wythnos. Ceir esboniad pellach a manylach am y rheolau newydd hyn mewn llythyr a fydd yn cael ei yrru at bob person sy’n archebu lle yn llety’r ifanc.
Aberystwyth:
Er bod rhaglen y gynhadledd yn gynhwysfawr, bydd digon o gyfle i ymlacio a meddwl dros yr hyn sydd wedi ei glywed, yn enwedig gan fod traeth y Borth yn agos a digon o gaffis a siopau yn Aber. Bydd paned ar gael a chyfle i gymdeithasu cyn cyfarfod y bore ac ar ôl cyfarfod yr hwyr bob dydd yn festri y Morfa.
Croeso
Bydd aelodau o dîm croesawu y Gynhadledd ar gael ym mhob cyfarfod i roi cymorth.
Gwaith MEC
Bydd arddangosfa o waith MEC i’w gweld yn ystod yr wythnos gan gynnwys stondin lyfrau a fydd yn cynnwys nifer o’n cyhoeddiadau.
Cyfieithu ar y pryd
Bydd cyfieithu ar y pryd i’r Saesneg ar gael ym mhob un o’r prif oedfaon. Bydd clustffonau i’w cael yn y cyntedd ar y ffordd i mewn i’r capel.
Recordiau’r Gynhadledd
Os ydych am gael blas ar weinidogaeth y Gynhadledd neu os byddwch am ail wrando, bydd copïau o’r catalog diweddaraf ar gael o Stondin Lyfrau MEC, neu anfonwch am gopi o’r Swyddfa ym Mryntirion. Mae’n rhestru holl anerchiadau a phregethau’r Gynhadledd dros yr 20 mlynedd diwethaf.
Ysgrifennydd y Gynhadledd:
Rhun Emlyn
Ysgrifenyddes Llety:
Gaynor Jones
Am fwy o wybodaeth ac i archebu lle cliciwich ar y dolennau isod: